_To the ryght worshypfull Sir, John Paston, and to my brothyr, John
Bokkyng._
[Sidenote: 1455 / NOV. 13]
Please it yow to have yn knowlege that y veele well my maister takyth
gretely to hert the materes whych he hath wryt to you uppon the
execucion of my Lord of Bedford ys godes, and in especiall for the
recuveryng of hem, as well as of Sir Andreu O.[51.2] executors as of Sir
Robert Whytyngham, &c. to th’entent that it myght be opynly knowe yn hys
lyve tyme that they be not yn his gouvernaunce no part of it, and that
hys factors after hym shuld not be troubled ne charged for it. And seth
the seyd mater ys of so grete wyght and charge, and that he takyth it so
gretely to hert, puttyng hys grettist trust yn yow, to remembre thys
seyd mater by avyse of hys councell lerned, both spirituell as
temporell, that ye wolle not delay it, but wyth all your entencion
remembred there, as ye by your wysdoms shall thynk it moste expedient,
that som fruyt may grow of it.
There ys ynowgh whereoff, and it myght be recuvered, John Bokkyng, ye
know ryght moch yn thys mater, and mooste of my maister ys entent
hereynne. And therfor, for myne acquytaille, y wryte to you to shew the
chieff wrytynges of the copy of endentures of Sir Robert Whytyngham, and
of othyr wrytynges concernyng that to Maister Paston, that he may be
more rypelyer grounded yn the seyd mater when he shall comyn wyth my
Lordz of Caunterburye, Cromewell, and with onye of my maister councell.
And our Lord kepe you.
My maister carpyth so oft on it dayly, and that meovyth me to wryte to
yow both. Att Castre, xiij. day of November.
Your,