_To Sir James Gloys._
[Sidenote: 1455 / JULY 25]
Ther be dyvers thynges in your letter sent to me; one that a
slaw[n]derus noyse shuld renne ageyns Yelverton, Alygton and me, to
brynge us owte of the conceytes of the puple be Heydon and his
dyscyplis, of a bill that shuld have do put uppe in to the Parlement
ageyns my Lord of Norwich and odir. I lete yow wete this is the furst
day that I herd of any seche, but I wold wete the namys of hem that
utter this langage and the mater of the bill. As for my Lord of Norwych,
I suppose ye know I have not usid to meddel with Lordes maters meche
forther than me nedith; and as for Sir Thomas Todynham, he gaff me no
cawse of late tyme to labor ageyns hym, and also of seche mater I know
non deffaut in hym. And as for Heydon, when I putte a bill ageyns hym I
suppose he shall no cause have, ne his discyplis nother, to avante of so
short a remedy ther of, as ye wrygth they sey now. As for that ye desyr
that I shuld send yow word what I shuld sey in this mater, I pray yow in
this and all other lyke, ask the seyeres if thei will abyd be ther
langage, and as for me, sey I prupose me to take no mater uppon me butt
that I woll abyde by; and in lek wys for Yelverton and Aligton. And that
ye send me the namys of them that ye wryte that herd this langage seyd
shrewedly, and what they seyd; and that ye remembre what men of
substance wer ther that herde itt; for if this can be dreve to Heydon or
his dissyplis, as ye wryte, it wer a gode preve that they fere to be
appelyd of seche materes. And I thank yow for your godwill. Wrete att
Norwych, on Seynt James day.
[Footnote 46.2: [From Paston MSS., B.M.] This letter, which is
printed from a draft in John Paston’s hand, was written in
answer to the preceding, to which the reader is referred for the
evidence of its date.]
302