_To my cosyn, Margeret Paston, be this letter delyvred._
[Sidenote: About 1455(?) / JUNE 29]
Ryght worshipfull cosyn, I recomaund me unto you, desyryng to here of
youre welfare; and if it like you to her of my welfar, at the makyng of
this letter I was in good hele, loved be God. The cause of my wrytyng to
you at this tyme is this, praying you to send me word of youre welfare,
and how ye do of youre seknesse, and if the medycyn do you ony good that
I send you wrytyng of last; thankyng you of the grete frenship that ye
have do to my moder with all my hert.
Also I pray you that ye wyll be good meyn to my cosyn youre husbond,
that he wyll se that my fader be well ruleyd in his lyvelode for his
worship and his profett.
Also prayng you to hold me exschusyd that I have wryten no ofter to you,
for, in good feth, I had no leysir; for my Lady hath be seke at London,
ner hand this quarter of this yere, and that hath be grete hevinesse to
me; but now, blesyd be God, she is amendyd and is in the contre agayne.
Also thankyng you of the grete chere that I had of you when I was with
you laste with all my herte, prayng you of good contenuanse, for I had
never gretter nede than I have now, and if I had leyser and space,
I wolde write to you the cause.
No more at this tyme, but the Holy Trenite have you in his kepyng.
Wryten at Wyndesore, the xxix. day of June,
By youre pore bede oman and cosyn,