_To my wurshipfull maister, John Paston, Esquier._
[Sidenote: 1455 / JUNE 24]
Mi Maister Paston, I recomaunde me to you. And wher ye shulde be
enformed that I shulde sey to Howard[38.2] that ye labored to be Knyght
of the shire, I seid never soo to hym. I tolde my Lord of Norffolk atte
London that I labored diverse men for Sir Roger Chaumberleyn, and they
seid to me they wolde have hym, but not Howard, in asmeche as he hadde
no lyvelode in the shire, nor conversement [_i.e._ acquaintance?]; and I
asked them hom they wolde have, and they seid they wolde have you, and
thus I tolde hym. And he seid on avysely, as he kan doo full well,
I myght not sey ye labored ther, for I herde never sey ye labored
therfor, be the feithe I vowe to God.
As for this writ of the Parlement of Norwich, I thanke you that ye will
labour ther in; as for my frendys ther, I truste right well all the
aldermen, except Broun[38.3] and sech as be in his dawnger.[38.4] I prey
you spekith to Walter Jeffrey[38.5] and Herry Wilton,[38.6] and maketh
them to labour to your entent. I prey you that yf ye thenke that it wull
not be, that it like you that to sey that ye meve it of your self, and
not be my desire. Sum men holde it right straunge to be in this
Parlement, and me thenketh they be wyse men that soo doo.
Wreten atte Intewode,[39.1] on Sceint John day, in hast.
Your servaunt,