_To William Worcester, be this lettre delyvered in hast._
[Sidenote: 1455 / JUNE]
Sir, I recomaunde me to yow; and as for tydyngs, ye may enforme myn
mayster, there is non but that he hath knowleche of, but that the Kyng,
the Quene, and the Prynce remeven to Hertford to morwen withought faute;
myn Lord York to the Fryres at Ware; myn Lord Warwyk to Hunesdon; the
Erle Salysburye to Rye; and there they shall abyde to tyme the Parlement
be gynne.
The Duk Buk is come inne, and sworn that he shal be rewled, and draw the
lyne with theym; and ther to he and his brethern ben bounde by
reconysaunce in notable summes to abyde the same.
The Erle of Wylts sent to the Lordes from a place of his, called
Peterfeld, a lettre desyring to know if he shuld come, and abyde abought
the Kynges persone as he dede be fore; and if he shuld not, than that
they wold lycence hym to goon in to Erland, and leve there upon his
landes, &c., and before this don, the Lordes were advysed to have made
hym to don as the Duk Buk hath don, and no more; but what that wolle
falle now therof, no man can telle as yet.
The Baron of Dudley is in the Towre; what shal come of hym, God wote.
The Erle of Dorsete is in warde with the Erle of Warrwyk.
Hit was seyd, for sothe, that Harpere and ij. other of the Kynges
chamber were confedered to have steked the Deuk York in the Kynges
chamber; but hit was not so, for they have clered theym therof.
But London upon the same tale areysen, and every man to harneys on
Corpus Christi even, and moche adoo there was.
Syr William Oldhall a bydeth no lenger in Seyntwery than the Chef Juge
come, for that tyme he shal goo at large, and sewe all his maters
himself, &c.
The Baron Dudley hath appeched many men; but what they ben, as yet we
can not wete. Sir Phillyp Wentworth was in the feld, and bare the Kynges
standard, and kest hit down and fled. Myn Lord Norffolk seyth he shal be
hanged therfore, and so is he worthy. He is in Suffolk now. He der not
come abought the Kynge.
Edmond Stendale was with Wenlok there in the feld, and ffowly hurt.
Fylongley is at home at his owen place with his wyf, and shal doe ryght
weel; but we have a greet losse of his absence this terme, for hit wole
be longe er he come this terme, I am a ferde.
Alle the Lordes that dyed at the jorney arn beryed at Seynt Albones.
Other thinges ben non here, but ye shal sene by Thomas Scales lettre the
rewle of the Frenshemen, &c.
God spede us weel in our matres this terme, I praye to God, who have yow
in his kepyng, &c.