_To myn ryght worshipfull mayster, Sir John Fastolf._
[Sidenote: 1454 / NOV. 3]
Please youre maystership, the cause of myn terying is that I must ben at
Norwyche on Monday at the shyre to stoppe the oughtlawrye of John
Porter, wheche but if be holpen, he shalben dowble oughtlawed bothe atte
the sewt of the Kyng for a reskuse, as for serteyn money he oweth to on
Hewghe, a man of court. And also the next day I shuld ben, if it please
yow, at Saxthorp with a certeyn person, as I shal telle youre
maystership here after, of whom I shuld have certeyn evydences of the
maner of Saxthorp, and rentall, and fyrmall as I am promysed. And, Sire,
as for alle the maters that I went fore in to Essex and Suffolk, I have
spedde theym, as I shal declare to youre maystership at myn comyng, and
brought wryghtyng from theym. And as for myn Lord of Norffolk, towchyng
your money, he seyth ye shal have hit with inne this xiiij. dayes. Hit
was his fyrst mater to me after I hadde delyvered his rynge. The money
is redye, but he seyd that he must have stoor with inne hym, for he
loked dayly whan the Kyng wold send for hym. But as sone as Barette, his
tresorer, come home--whom he hath sent for money,--ye shall in contynent
after have your C_li._ [£100]. I made to his Lordship as I hadde no
thyng know in the mater for onely for the excuse of Sir Thomas, &c. And
I beseche the blessed Trinyte preserve yow, myn ryght wurshipfull
mayster, after his pleasaunce and youre herts desyre, &c.
Wreten in hast at Wroxham, the Sonday after Allehallwen day.
Youre bedeman and servaunt,