[_Concilii episcopalis Valentie inhibitiones circa portum_][A].
CONCILIUM episcopale reverendi in Xpisto patris & domini nostri dom,
Johannis de Pictavia, Dei gracia episcopi & comitis Valentinensis &
Diensis, in Valentia residens, viro nobili Eynardo Charnay subconreario
Valencie, necnon preconi publico & cuicumque secularis curie Valencie
servienti, salutem. Visis literis nobis pro parte potentis viri domini
Crusseoli & procuratoris ecclesie Sancti Petri de Burgo Valentie, factum &
declaracionem portus & rasseriorum Valentie in se continentibus, ad
effectum excequtionis contentorum in eisdem exhibitis & presentatis, quarum
copia presentibus est annexa, vobis & vestrum cuilibet harum serie
precipimus & mandamus quatenus omnia & singula in literis eisdem contenta
predict. rasseriis & piscatoribus presentis civitatis Valentie notifficetis
tam voce preconis quam in eorum propriis personis, adeo ut ignorantie
causam pretendere non possint, eisdemque & eorum cuilibet inhibeatis &
deffendatis sub pena in dict. licteris contenta ne abinde inanthea
quoquomodo aliquas merces seu homines ultra formam & tenorem dict.
literarum transire de regno in imperium & econverso in eorum naviolis sive
rasseriis ultra solitam consuetudinem & dict. literarum tenorem presumant;
intimantes eisdem & eorum cuilibet quod, si contra prohibitionem &
deffensionem predictas fecerint, contra ipsos & eorum quemlibet, necnon ad
exactionem dicte pene procedemus ut juridice fuerit procedendum. Datum
Valentie, die decima octava mensis maii, anno Domini millesimo
quatercentesimo decimo nono.