Se pris et los estoit à departir
Et à donner, selon mon jugement,
J'en sçay aucuns qui bien petitement
Y devroient à mon avis partir.
Et, non obstant qu'ilz cuident bien avoir
Assez beauté, gentillece et proece,
Et que chascun cuide un prince valoir,
A leurs beaulx faix appert leur grant noblece.
Mais puis qu'on voit, qui qu'il soit, consentir
A villains faits et parler laidement,
Pas nobles n'est; ains deust on rudement
D'entre les bons si faitte gens sortir
Se pris et los estoit à departir.
Ne en leurs dis, il n'a nul mot de voir
Grans vanteurs, sonts n'il n'est si grant maistrece
Qu'ilz n'osent bien dire que leur vouloir
En ont tout fait, hé Dieux! quel gentillece.
Comme il siet mal à noble homme à mentir
Et mesdire de femme et vrayement!
Telle gent sont drois villains purement,
Et devroit-on leur renom amortir
Se pris et los estoit à departir.