_To my moste honorabyl Lord Cadenall, and Archibushop of Caunterbury._
[Sidenote: 1468 / OCT. 10]
Moste reverent and my ryght good Lord, I recomaund me to your gracyous
Lordshyp yn my moste humble wyse. Please your Lordshyp to wete that my
Lord Norffolk councell hath now late mevyd Sir Wylliam Yelverton,
Knyght, and me to be preferryd for to purchasse the maner of Castre, and
certeyn other lordshypps that wer my Maystyr Fastolf, whom God pardon,
owt excepted the maner of Gunton that yowr Lordshyp desyryth to
purchasse, and othyr certeyn maners that my Mastyr Fastolf frendys hafe
desyred to be preferryd. And be cause the pretens bargayn that John
Paston yn hys lyffe surmytted, bye colour of which he entended to hafe
all my Mastyr Fastolf londes in Norffolk and Suffolk for nought, savyng
the hygh reverence of your astate, was not juste ne trew; and be cause
that I wyth othyr of my Master Fastolf executors may have wher of to
dyspospose yn cheryte full dedys to do for hys sowle; I have
condescended the rather that my seide Lord of Norffolk shall be
preferryd to the purchasse of the seyde maner of Castre, and othyr
maners that may be sparyd to th’encresse of hys lyfelode yn thys land;
and thys covenantys to be engroced upp wythynne shorth tyme, as by all
Halowaunce, in case yowr Lordshyp be agreed and plesyd wyth all; wher
uppon I wold beseche yowr nobyll Lordshyp to lete me wete your good
plesur and avice yn thys behalfe.
And be cause my seyd Lord Norffolk ys so nere of blode to yowr hyghnesse
knyghted, that meevyd me to be the more wyllyng to condescend to the
forseyd purchasse, and so trustyng your Lordshyp wold be ryght well
pleased wyth alle. Wretyn at Norwich the x. day of Octobyr, anno viij.
R. E. iiij^{ti}.
Yowr pore chapleyn,