_To my worshipfull cosyn, Symond Damme, [at] Lyncoln Inne, at London,
[be] this delyvered._
[Sidenote: 1467(?) / JULY 2]
Right worshipfull sir, and as in my trost my veray speciall good
maister, I recomande me to you with al the servyce I can and may. Lyke
it you to wytte that I have do my bysynes to enquere for suyche dedes as
ye wrot for on to me, and, so God me helpe, I can not wytte where I
shuld spede to have ony suyche dedes. I spak to a persone that is your
good lover, the whiche tolde me that ther was a gret plee bytwene my
Lord of Suffolk and Sir John Fastolf for the maner of Drayton, for
whiche matier William Wysetre was sent to enquere for evydencez touchyng
the Pooles lyvelond in suyche places as thei were lords of in their
dayes. And the seid Wysetre fonde evydencez that touched a maner called
Mundham maner, sum tyme longyng to the Pooles that were owenners of
Drayton, the whiche evydences eased meche Sir John Fastolf; but the seid
persone that enfourmed me of this can not telle the armes, ne what
evydencez tho shuld be in certeyn, savyng he thynkyth indoubted that
William Worcetre shuld not be unremembred of this. Wherfore it is
thought to the same persone that enfourmed me of this and by me also,
that it shuld be expedyent for you to comune of this matier by your
wysdam with the same William Wysetre, now beyng at London, for he by
lyklyhod can telle you a certeynte. And as touchyng my maister, Sir
Thomas Mongomery, I trost veryly that he nothyr hath ne shall have cause
of grudger by my defaut, for I can not understond ony cause of grudger;
for ever whanne my cosyn Damme[281.1] hath spoken with my seid maisters
attourne to have knowelage by writyng of what thyng shuld be the cause
of callyng on you, he answerith that my maister, W. Paston, hath a bille
therof, but my cosyn can non gete. Wherfor I deme that the seid attourne
meneth not weel. I entende noon other but in als meche as in me is to se
your indempnyte with the grace of God, who ever mote be your guyde and
protector. Wretyn at Norwich the ij. day of Juylle.
Your servaunt in that he can and may to his powar,