_To my right wurchipfull husbond, John Paston, be this deliverd in
hast._
[Sidenote: Year uncertain / NOV.]
Ryth worchepfull husbonde, I recomande me to yow. Plesyth yow to weet
that Thomas Grene was with me as on Saterday last paste, and let me have
knowlage that the scherre schold be as thys day at the Gyld Hall in
Norwyche, and he desyiryd me that the swte that ye have ageyns Thomas
Jeryng and othyr myth be sesyd as for thys schere; and I seyd that I
durste do ryth not there in. And he tolde me that Thomas Jeryng was with
yow in Flegge the laste tyme that ye wer ther, and ye seyd to hym that
he scholde not be hurte by the swte. And Thomas Grene told me that if
the seyd Jeryng and othyrs in the same wryte mad not an end with yow by
the nexte schere, the whyche schall be thys day monyth, that he the seyd
Thomas Grene wole purchese a new wryte of hys owne coste ayens that
daye. I woste not that the scher shuld be so sone when I wrote to yow
yowyr laste lettyr. And he remembyryd the trobulus werd [_world_] that
is nowe, and also that they wer nowtye felawys that ye suyd, and ther
fore he thowte that it war best to let it be respyte at thys tyme, and
so they schall be respyth at thys tyme. I have sent to Jaferay Spyrlyng
for the bokys that ye sent to me fore, and he seyth that he hathe none
there of, for he seyth he lefte hem with yow when he was with yow in the
Northe contre; for he seyth ye left hym behynd yow at Lynkcolne. He
supposyth they be at Kaster.
Item, my cosyn Crane recomandyth hyr to yow, and prayith yow that ye
wole wychesave to spek to Jamys Gresham for to swe ferthe the mater
betwyx Dame Margaret Spurdans and hyr; and sche prayith yow at the
reverens of God that ye wole tendyr that mater well, for all hyr troste
is in yow.
Item, the tenauntys at Sweynysthorp prayid me for to wryte to yow for to
pray yow for Goddys sake that ye wole help for to get hem a good baly of
the hundyryd that they be in; for they sey that they have be gretly
hurte by swyche offyserys as they have had ther be fore tyme. Folk wold
fayne in thys contre that Heydon scholde be purveyd for, that he goo not
so at large as he dothe, for he is in thys towne nere every wek, and
hathe be ever syne ye yd hens. And also it is seyd in thys towne that ye
have be good maister thys terme to Yatys, and many be ryth sory ther of,
and that he dothe so well as it [is] seyd here that he dothe. It is seyd
that he is scapyd all dangerys, and he hathe tak new accionys ageyns hys
neyborys, as it is seyd. Othyr tydyngys have we none here but that ye
have more pleynly there. And the Blyssyd Trinyte have yow in Hys kepyng,
and send yow good sped in all yowyr materys. Wretyn in haste at Norwyche
the Monday next be fore Seynt Edmunde the Kynge.
Be yowyr,