_Un to the ryght wyrshypfull mayster, Sir John Paston, Knygt, be thys
letter delyveryd._
[Sidenote: 1466 / FEB. 17]
Ryght wyrshypfull and my especyall gode mayster, I recomaund me unto
your gode maystershyp, letyng you wyte that the berour herof told me
that ye had grete mervyll that I send to you no word ne letter of
awnswer of the letters that ye had send to me to London. As for on
letter ye send to me by Rychard Playtorys man, and therof I send you an
awnswer in a letter by a man of the Prior of Bromholm; and as for other
letters, ther com no more to me but that on.
Item, Mayster Flemmyng lokyth dayly for hys hors, and at every tyme that
I mete with hym, he askyth of me when hys hors shuld com, and when I
here any word from you. Wherfore I pray you send me word in a letter how
he shall be awnswerd, and yf the hors shall com, lette me knowe when;
for and he had not trustyd theruppon, he wold have purveyd hym in a
nother place, &c.
Item, John Oter ys not yet payd, but as I suppose it shall not be long
to tyll he have it, for he hath spoken to my mayster your fader a yer
therfor; and as for Gylmyn, he hath not spoken to my mayster as yet, &c.
Item, I truste he wylbe your gode fader, for John Say hath told hym
playnly of hys demenyng ayenst you, and told hym that he had the lasse
favour for your sake, &c.
Item, the Erle of Arundell ys[217.1] son hath weddyd the Quyne ys
suster.
Item, the Lord Lovell ys son[217.2] hath weddyd my Lady Fytzhugh ys
doghter, &c.
Item, Jenney desyryth a trety with my mayster, and spake to my mayster
therof hym sylf in Westminster Hall.
Item, all felaws in the Kyngs hows fareid well, and wold have you ther.
No more to you at thys tyme, but the Holy Trynyte have you [in] kepyng.
Wryten at London, the Monday next after Seynt Volentyn.
Your servant,