_To my Rightwurshipfull hosbond, John Paston, be this delyveryd in
hast._
[Sidenote: 1441-65 / NOV.]
Riht worchipfull hosbond, I recomand me to yow, praying yow to wete that
I have receyvid the mony that Mayster Brakle had of yow, wherof he hath
ageyn v. marc. uppon pledgis of the too basonys that ye had of hym tyll
ye come hom. As for cloth for my gowne, I can non gete in this town
better than that is that I send yow an exsample of, whiche me thynkith
to symple bothe of colour and of cloth. Wherfor I pray yow that ye woll
vouchesauf to do bey for me iij. yerdis and j. quarter of seche as it
pleasith yow that I shuld have, and what colour that pleaset yow, for in
gode feyth I have do sowte all the draperis schopis in this town, and
her is right febill cheys. Also I pray yow that ye woll do bey a loff of
gode sugour and di. j. lb. [_half one pound_] of holl synamun, for ther
is non gode in this town; and as for mony, ther is non of your tenantis
ne fermouris bryngith non as yett. As for tydyngis in this countre,
Herry Ingloses men have slayn ij. men of Tonsted on Thursday last past,
as it is seyd, and all that countre is sore trobelid therwith; and if he
had abedyn at home he had be lyke to have be fechid owte of his owyn
hows, for the peple ther abowght is sor meved with hym. And on Saterday
last past he come ryding thorow this town toward Framyngham; and if he
had abedyn in this town he shuld have ben arestyd; for men of Tonsted
and of the countre pusewid after hym in to this town, and made agrett
noyse of hym, and required the mayre and sheryves that he ne his men
shuld not pas the town, but that they shuld do as it longed to here
parte to do, and told hem the cause why; and as it is seyd the
sergeantis were fals, and lete hym have knowleche ther of, and he hythid
hym hens in hast, &c. The blyssyd Trynyte have yow in His keping. Wreten
att Norwyche on the Weddenesday next after Seynt Martyn.
Be yowris,