_[To] his ryght worschypful [fa]dre John Paston, beyng [in t]he Flete at
London, be thys delyvered._
Ryght Worschypful Syr, in the most lowly wyse I recomand me to you.
Pleasyth it you to wet that I sente you a letter but late agoo, in whych
letter I lete you have understondyng that if it pleasyd yow to grante
and assente therto, Syr Thomas Howes wolde resyngne the benefyse of
Mawteby to a ful prestly man of Norwych callyd Sir Thomas Lyndys, whom I
suppose ye have knolech of. Neverthelesse I wote wele he hath not ben
grettly aquentyd with you. But I and he have ben moch aquentyd to geder,
and I understond and knowe hys vertews levyng and dysposicion ryght
wele; whyche heraffter, I wote wele, sholde please you ryght wele. And
that letter whyche I sente you as I understode syns Nycholas Calman the
berer ther of came not owte of Norwych iiij. or v. dayes after that the
bylle was delyveryd hym; wherefor I am in dowte whyther it is come to
your handes.
Whych causyth me to wryght to you ageyn in thys wyse, besechyng yow, if
it plese yow that the seyd Sir Thōs Lyndys schal be of your promotynge
in the wyse above wretyn that there it lyke you that I may have answer
by the berer herof; whych schal tary at London a day or ij., and not
passynge. No more to yow at thys tyme, but Alle myghty God have yow in
guydynge. Wretyn at Heylesdon the Fryday next byfore Seynt Mychell.
By yowr older sone,