_To my mastras, Margaret Paston, be this deliveryd in hast, at London._
[Sidenote: 1465 / SEPT. 14]
Aftyr all humbyll and most dwe recomendacion, as lowly as I can,
I beseche yow of your blyssyng. Plesyt yow to wet that I have sent to my
fadyr to have an answer of syche maters as I have sent to hym for in
hast, of whyche matyrs the grettest of substans is for the maner of
Cotton, besechyng yow to remembyr hym of the same mater, that I may have
an answer in the most hasty wyse.
Also I pray yow that myn Ante Poonyngys[185.2] may be desyiryd to send
me an answer of syche materys as sche wotyth of, by hym that schall
brynge me an answer of the mater of Cotton.
Also, modyr, I beseche yow that ther may be purveyd some meane that I
myth have sent me home by the same mesenger ij. peyir hose, j. peyir
blak and an othyr payir roset, whyche be redy made for me at the hosers
with the crokyd bak, next to the Blak Freyrs Gate, within Ludgate; John
Pampyng knowyth hym well jnow I suppose. And [_if_] the blak hose be
payid for he wyll send me the roset un payd for. I beseche yow that this
ger be not forget, for I have not an hole hose for to doon; I trowe they
schall cost both payr viij_s._
My brodyr[186.1] and my sustyr Anne,[186.2] and all the garyson of
Heylysdon fare well, blyssyd be God, and recomand hem to yow everychon.
I pray yow voysyt the Rood of Northedor[186.3] and Seynt Savyour, at
Barmonsey,[186.4] amonge whyll ye abyd in London, and lat my sustyr
Margery[186.5] goo with yow to pray to them that sche may have a good
hosbond or sche com hom ayen; and now I pray yow send us some tydyngys
as ye wer wonte to comand me; and the Holy Trinyte have yow in kepyng,
and my fayir mastras of the Fleet. Wretyn at Norwyche on Holy Rood Daye.
Your sone and lowly servaunt,