_To my right worschipfull husbond, John Paston, in hast._
[Sidenote: 1465 / JULY 12]
Ryght worshypful husbond, I recomaund me to yow, preyeng you hertyly
that ye wyl seke a meen that yowr servauntys may be in pees, for they be
dayly in fer of ther lyvys. The Duke Suffolks men thretyn dayly
Dawbeney, Wykys, and Richard Calle, that wher so ever they may gete them
they schold dye; and affrayes have ben made on Rychard Calle this weke,
so that he was in gret jupperte at Norwych among them; and gret affrayes
have ben made uppon me and my felashep her on Monday last passyd, of
whych Rychard Calle tellyth me that he hath sent yow word of in
wryghtyng, mor pleynly than I may doo at thys tyme, but I shal informe
yow mor pleynly heraftyr.
I suppose ther shal be gret labor ageyn yow and yowr servaunts at the
Assysis and Cescions her; wherfor me semyth, savyng your better advyce,
it wer wele do that ye shold speke with the Justicys or they com her;
and yf ye wol that I compleyn to them or to any other, if Good fortune
me lyfe and helth, I wol do as ye advyse me to do, for in good feyth I
have ben symply intretid among them; and what with syknesse, and troble
that I have had, I am browte ryght lowe and weyke, but to my power I wyl
do as I can or may in your maters.
The Duk of Suffolk and both the Duchessys shal com to Claxton thys day,
as I am informyd, and thys next weke he shal be at Cossey; whether he
wol com ferther hyddyr ward or not, I wot not yit. It is seyd that he
schold com hyddyr, and yet hys men seyd her on Monday that he cleymyd no
tytyl to thys place; they seyd ther comyng was but to take out such
ryotus peple as was her within thys place, and suche as wer the Kyngys
felonys, and indytyd and outlawyd men. Neverthe lesse they wold schew no
warauntys wherby to take non such, thow ther had suche her; I suppose if
they myght have com in pesably, they wold have made an other cause of
ther comyng.
Whan alle was doo and they scholde departe, Harlyston and other desyryd
me that I schold com and se myn olde Lady, and sewe to my Lorde, and if
any thyng wer amysse it schold be amendyd. I said if I scholde sewe for
any remedye, that I scholde sewe ferther, and lete the Kynge and alle
the Lordys of thys lond to have knowlech what hathe be don to us, if so
wer that the Deuk wolde meynten that hathe be don to us by hys
servauntys, if ye wolde geve me leve.
I pray yow sende me worde if ye wyl that I make any compleynt to the
Duke or the Duchesse; for as it is tolde me, they know not the pleynesse
that hathe ben don in such thyngys as hathe ben don in her [_their_]
namys.