[Sidenote: 1465 / JUNE 15]
Ryth reverent and worchepfull fadyr, I recomand me on to yow, beschyng
yow lowly of your blyssyng. Plesit yow to have knowlage how that I have
be in Sowthefolk for syche materys as my cosyn Dawbeney took my modyr a
byll of, towchyng the materys be twyx yow and Jenney. And of all the
jentylmen that ye wold my modyr schold send to for thys mater ther ar no
more at home bot John Alyngton; and I schewyd hym the byll of the namys
of the Inqwest and knew no more of hem all bot thes, John Depden, Thomas
Wodborne, John Donemowe, Herry Chesten, and Adam Wrene. And to all them
Alyngton sent a man of hys for to fele hem how they wer dysposyd. Thys
was the answer of John Depden and Thomas Wodborne, they sayd the last
tyme they wer at London iche of ther costys stood hem on x_s._, and they
seyd they wold no mor come at London bot if[150.2] they knew who schod
pay for ther costis; but me thowt by Alyngtonys man that they wold have
had a brybe of yow be syd the paying for ther costys for to have bedyn
at home, for they have non othyr levyng but brybys. As for John Donemow
and Herry Chesten, so that ther issuys may be payd they wyll not come
ther; nor in trowthe they scholl not come ther. Wher for Alyngton
prayith yow that ther issuys may be payid. Adam Wrene was not spoke to,
for he is Jenneys baly or hys fermour. As for the quest they ar not yet
somoned to aper, and but if[151.1] they be somonyd ther scholl non of
hem all aper. The most part of the todyr dwell a bowt Ippyswyche and
they be Debnamys tenauntys and Brewsys, and I knowd get no man to spek
with hem but if[151.1] I schold have spok with hem my selve; and my
spekyng with hem schold rather aperyd [_have impaired_] the mater than a
mendyd it. And also I hyid me the faster home a geyn, for I lay at my
cosyn Lovedays on Corpus Christi Day at nyth; and he told me that the
Duches of Sofokys consell wold entre in to Calcot Hall, and they wold
kep it tyll the Duches knew who schold be her tenaunt, owthyr ye or
Debnam. Thus told one of the men of the seyd cowncell to Loveday; whyche
man schold ryd thedyr with hem. And thys schold be do as to morow at
aftyr non; bot I trow they wole but tak a distres for the servys of the
maner, whych is dwe; but I have sent word to Rysyng and to the tenauntis
that they schold dryve a wey ther catell. And as for the maner, my
brodyr and I scholl kepe it so that they schall not entyr as that daye,
by the grase of God, nor aftyr nowthyr and [_i.e._ if] we may knowe of
it, but if[151.1] ye send us othyr wys word. As for the namys that ye
wold have for to pase upon the mater betwyx yow and Hogan, I spok to
Alyngton and Loveday therof, and Loveday seyd he knew non that wold pas
up on ony inquest for hym, for he medylyd with no syche men; and
Alyngton seyd that he kowd assyne me none men for serteyn, not tyll he
had spok with some, whyche he seyd wold aske gret leyser, for he knew
bot fewe in Sofolk; if it had be in Cambrygge schyre he kowd have get
you j now. My modyr spak with old Banyard of Sibton Abbey for the same
mater, and he knew none that wold pase upon the mater at his desyer, but
he asygnyd dyvers men that love not Jeney, whyche he kowd thynk wold
pase upon it at yowr desyer if ye spok with hem your selve; or at the
lest iche of hem kowd get yow ij. or iij. men that wold sey as they wold
in cas ye spok with hem your selve, whoys namys I send you in a byll by
Loveday. Item, as for the gape at Nakton Rychard Calle seyth that it was
a thorn busche was leyd in with owt a stake betwyx ij. thornys that
grew; and as for Jeneys netes, ther was not one lost her calfe that I
can inquer of. And I pray God farther yow in all youyr materys to Hys
plesans and to youer hertys desyir. Wretyn in hast at Hallysworthe the
Saterday next aftyr Trinite Sonday.
My cosyn Hevenyngham is at London, and he kowd asygne you men that wold
say as he wold mor than Syr John Wyngfeld, Alyngton, and all.
Your sone and lowly servant,