Yf it pleasyd you, I wold ryght fayn that John Jenney werre putte oute
of the Comyssyon of the Peas, and that my brother Wyll. Lumner wer set
yn hys stede, for me thynkyth it wer ryght necessere that ther were such
a man in that county that oght you gode wyll, and I knowe verely he
owyth you ryght gode wyll; he was with me at Caster but late. Yf ther be
made any labour for Doctour Alyn to be Justice of the Peas, I pray you
for Gods sake let it be lettyd yf ye may, for he wyll take to moch upon
hym yf he werr. I wold not that he wer remembyrd of your parte but yf
[_unless_] he be spokyn of of other parts: he ys ryght grete with Master
Phylyp Lypzate and the Baylyf of Coshay.
Yf it please yow to wyte that Wyks dyde a reste one Wyll. Dylmyn of
Norwych, as Pampyng can enforme you of, for sertyn harnys wych he
delyveryd hym at New Castell for to cary to Yarmoth by water, and ther
to delyver it to hym ayen; whych harnys he kypt styll, and may not be
delyveryd; and now ther ys com down an _habeas corpus_ for hym, and most
appyr at the Comyn Place [_Common Pleas_] on Fryday next comyng. Wherfor
yf it pleased you that ther myght be taken an accyon in Wyks name of
trespas under such forme as ther may be a _capias_ a wardyd a yenst hys
comyng; for after that he was arestyd he dyde Daubeney to be arestyd for
mayntenyng; and as for the harnys Wyks delyveryd it to hym the x. day of
Januar, the ij. yer of Kyng E.[142.1] in Pylgryme strete, at New
Castell: Inprimis, a peyr brygandyrs, a salet, a boresper, a bawe,
xviij. arwys, ij. payr polronds [_shoulder pieces_], a standard of
mayle, a payr slyvys of plate, to the valew of v. marc. And at the
reverens of God, slowth not your maters nowe, and make any end of hem,
other purvey you to make hym or to marre hem in haste, for thys ys to
orybyll a coste and trobell that ye have and have had, for to endur any
whyle, and it ys grete hevenys to your frends and welwyllers, and grete
joy and comfort to your ennemyes. My Lord of Norwych seyd to me that he
wold noth abyde the sorow and trobell that ye have abyden, to wyn all
Sir John Fastolf ys gode. And God be your spede in all yor maters.
Wryten at Haylesdon the xiij. day of May.