_Unto my maystres, Margageret Paston, be thys letter delyveryd in
hast, &c._
[Sidenote: 1465 / FEB. 7]
Ryght wyrshypfull maystres, I recomaund me un to your gode maystresshyp.
Please it you to wyte that my mayster your hosbond, my maystres youre
moder, my mayster Sir John, Mr. Wyllyam, Mr. Clement, and all ther men,
wer in gode helth, whon thys letter was wryten, thankyd be Jesu, and
also ther maters be in a gode wey, for my Lord Chaunseler ys ther
syngeler gode Lord in thys mater at thys tyme; and that it provyth, for
he was yesterday in the Escheker, and ther he had a foren hym alle the
Juges, all the Barons of the Escheker, and all the Shurgents, and ther
argued wher that the Barons of the Escheker shold award any such
Comyssyon or not, and uppon that the seyd Comyssyon shull be broght
uppon Fryday unto the Chaunsery, and ther to be provyd, wher it be
lafull or not, &c.
Item, and yf it please it you to gyve Daveney[127.2] knowlych that ther
ys jugement gyven uppon the condempnacion a yenst Hall,[127.3] that he
claymed for hys bond man, and the jugement ys gyven a yenst Daveney,
Ric. Call, and Thomas Bon, and ther ys comen owte proces for to take
ther bodys thys same day, and if thay or any of them be taken thay shull
never gon oute of prison on to the tyme that they have satesfyed the
party of viij^xx marc, and ther for lete them be ware. And the Holy
Trinyte have you in Hys kypyng. Wryten at London, uppon Thursday next
after the Purificacion of our Lady, &c.
By your Servaunt,