_Apunctuament’ Regis pro fundacione Collegij apud Caistre, &c._
[Sidenote: 1464 / SEPT. 10]
The Kyng, for the soume of CCC. mark of lawfull mony of Inglond, or of
silver plate to the valew therof, grauntith to John Paston the older,
Squier, to have licens, lawfully mad, to make and found a College of
vij. prests and vij. pore folk at Caster, in Flegge in Norffolk, for the
soule of Sir John Falstolf, Knyght; thei to be indued with certeyn rent,
and otherwise aftir the intent and effect as is specifijd in a bille
therof, signed by the Kyng; and that he shall showe his good grase,
favour, and assistance to have the said fundacon inacted and auctorised
in the parlement next holden, and discharge the seid John Paston and the
seid prests of any other fyne or fee to be mad in the Chauncerie for the
seid fundacion; and that the Kyng shall signe and graunt warants for
seid licens, and shewe his good grace and favour in the expedision
therof, what tyme he be sued to therfore by the seid John Paston.
Also, the Kyng grauntith to be good and favorabill Lord to the seid John
Paston, and inespeciall in all thyngs touchyng the execucion of the will
of the seid Sir John Fastolf, and also to be good and favorabill Lord to
the seid John Paston, in supportyng and helpyng hym, in that the Kyngs
Highnesse may lawfulle do, in such maters as are in debate athwyx the
seid John Paston and William Yelverton, or William Jenney, or any other,
concernyng the londs and tenements, goods or cattell, that were the seid
Sir John Fastolfs. Also the Kyng grauntith to help and support the seid
John Paston to opteyne and have to the use of the seid Sir John Fastolf
such goods as were the seid Fastolfs deseitfully aloyned out of the
possession and knowlech of the seid John Paston; and that the Kyng shall
graunt the seid John Paston such lawfull writynggs and lettirs from the
Kyng, directed to such persones as shall be behovefull for the same,
what tyme the seid John Paston suyth to the Kyngs Highnesse therfore.
Also where Yelverton, or Jenney, or any Justise of the Peas of the Shire
of Suffolk hath recorded any riot, trespas, or offenses to be do ayens
the Kyngs peas, by the seid John Paston, his servaunts, or tenaunts, or
frends; or where any inditement or presentment is found ayens them, or
any of them, before any of the seid Justises, for any such riot,
offenses, trespas, or for any other mater remaynyng of record in the
Kyngs Benche, or in any other plase, the Kyng grauntith to the seid John
Paston, and all other persones named in the seid records or inditements,
or in any of hem, and to alle her boroughs [_sureties_] and plegges, and
to ich of hem that woll sue it, a pardon of all riotes, trespas,
offenses, felonys, forfetures doon ayens the Kyngs peas, and of fynes
therefore dempt [_adjudged_], or to be dempt, and of all other thyngs
generally, treason except, and that the Kyng shall signe warants lawfull
of the seid pardons, what tyme his Highnesse be requerid by the seid
John Paston or his attornys.
And also that his Highnesse shall do inquere and examinacion be mad
whedir the seid record of the seid Justises and presentments, and other
informacions or compleynts mad ayens the seid John Paston, were do
trewly and lawfully or nought; and if it be found that thei were do
otherwise thanne trought, lawe, or consiens woll, thanne the Kyng
grauntyth to cause the doers therof to recompense the seid John Paston
and the seid other persones, as far as lawe and good consiens woll in
that behalf.
And that if it fortune any compleynt to be mad ayens the seid John
Paston, by any persone in tyme comyng, to the Kyng, that he shall take
no displeasir to the seid John Paston till the tyme he come to his
answer, and be found in defaut.
And that the Kyng shall receyve an C_li._ of the seid CCC. mark, what
tyme he send for it, and the remnaunt as sone as the seid fundacion take
effect; and also that his Highnesse shall gete the assent of the
reverent fader in God, the Archebisshop of Caunterbury, in such
apoyntments as is mad athwyx the Kyng and the seid John Paston, of such
goods as were the seid Sir John Fastolfs, for the delivere therof; and
that if the seid John Paston refuse the administracion of the goods and
catell that were the seid Sir John Fastolfs, sufferyng other to take it
opon hem, the Kyng, at the instauns of the seid John Paston, grauntith
to be good and favorabill Lord to such other as the coors of the lawe,
and assent of the seid John Paston, shall take the seid administracion
in execucion of the seid Fastolfs will, touchyng the administracion of
the goods and catell forseid, acordyng to the same wyll; and that the
Kyng shall not cleyme nor desire any of the londs or tenements, goods or
catell, that were the seid Sir John Fastolf, ayens the seid John Paston,
or any other executor, administror, or feffe of the seid Sir John
Fastolf, nor support or favour any other persone in cleymyng any of the
seid londs or tenements, goods or catell, ayens any the seid
administers, executores, or feffes.
And the Kyng grauntith that where as this bille is not sufficiently mad
in clauses and termes according to th’entent therof, that his Highnesse
woll take and execute the very entent therof, notwithstandyng the
insufficiens of any such termes and clauses in thes bille. Wretyn at
Marleburgh, the Monday next after the Nativite of oure Lady, the fourthe
yere of the reigne of the Kyng.
[Footnote 113.1: [From Fenn, iv. 182.]]
572