_To my ryght wurschipfull my mastre, John Paston, be this delyverd in
haste._
[Sidenote: 1464 / JUNE 28]
Plesith it youre goode maisterchippe to witte that I have be with my
Mastre Calthorppe for the matre ye wrote to hym fore, wherin I have
founde hym ryght weele disposed and favorabley; nevertheles he tolde me
that William Jenney hath bene hes goode frende and have ben of hes
councell this ij. yere in all hes matres towchyng the lawe, but he seide
lever he hadde lose the lesser frende than the greete frende, and so he
hathe graunted favour accordyng to youre desire, and wrote a lettre to
the undrescheryff of Norfolk that he schuld take suerte sufficient to
save hym harmeles, and that done to write a letter to the undrescheryff
of Suffolk and lete hym witte that he hath taken suerte that ye schall
appere in the _crastino Animarum_ upon the exigents returnable, or elles
to bryng a _super sedias_[108.1] lauful before that daye, chargyng hym
that he do sece [_cause to cease_] the callyng of the writts, and to
retorne that ye appered the furst day. Weche suerte is taken, and a
letter wreten to the undrescheryff of Suffolk acordynge herto.
Item, as for Sir Thomas Howes, he lythe most at Norwiche. I can thynke
he come not up to London tyll Michelmes.
Item, I rode over to Techewelle whan that I whas at Mastre Calthorppes
for to have money of the fermours, and Yelverton and Sir Thomas hathe
sent to hem that they schol pay to you no more money, for that they had
payed to you they schulde payed [_pay it_] ayene to them; and so I gane
[_can_] gete no money of hem. Wherfore I went for to distreyne hem; and
so they seide that I myght not distreyne hem, for I come before the
daye, for her [_their_] day is at Midsomer. Nevertheles I wold not
lette, for that Simond Miller and other promysed to Mr. William Cotyng
and to me that I schuld have the money aftre Midsomer, so that I brought
with me a quetaunce of suche money as ye have receyved of hem, or elles
a generall quetaunce; and the tone I purposed to do in haste be the
advice of the seide Mastre W. Cotynge. For, and I torned, I can thynke
it schuld hurte. I am purposed to lete it in youre name to other folks
or to them ayen, and suerte founde to you, &c. And Almyghty God preserve
and kepe you. Wreten at Norwiche on Sen Petres Even.
Your pore servaunt and bedman,