_To my right worshipfull master, John Paston, the elder, Squier._
[Sidenote: 1464 / FEB. 29]
Please your mastership to wete that the Assise holde this day at
Thetford; and as for any newe Assise, that ye spak of, ther is non, ner
non other savyng on for a man a bought Brunham.
I spak with Herward, and I askyd hym if ther was any gret day at Bury,
and he seid ther was but a small day, and as for any assises ther wer
non but old; and he told me that Debenham and the Undershireff were
falle ought. Debenham bare the Shireff on hand[94.1] that he had do
indited an hundred men son he cam in to his office, and the Shireff told
hym that the Kyngs bokkes apperid whedir it was so or nought; and he
told Debenham that he coud indite an hundred at on tyme whan ye wer
indited, and named yow the cause of ther brekyng.
Ther was a man kyllid now late in Suffolk, and he that ded it was on of
Debenhams men; and Herward told me that the Shireff seid to hym he wold
do Debenham a shrewd turne and he coud.
Item, it was told me at Norwich that Master Berney shuld have be here
with a gret felaship, and it is not so, ner no man heryth of hys comyng,
ner her is but litell pepill nowther, ther wer not so few this iij. yer,
as men say.
Item, Herward askyd me where John Gayn was, and I askyd why, and he seid
ther is a _capias_ ought ayens hym upon the condempnaceon,[94.2] and the
Shireff hath it, he bad me geve hym warnyng; it is retarnabill xv.
Pasch.[94.3]
Item, thei sey here that the Kyng was on Monday at Waltham.
Item, Nicholas Colman hath brought home your fardell; it is at Norwich.