_To my mooste reverent and wurchipfull mastre, my Mastre John Paston, be
this delyverd._
[Sidenote: 1464 / FEB. 27]
Plesith it your goode mastreschip to undrestande that I have receyved a
byll of John Boteler, weche speketh of your heygh at Heylesdn, and of
your barly in other places, but I undrestand not what ye wold I schulde
do therin; nevertheles I schal do make it redy. And as for your heygh I
schull tell you whan I come hume; and as for money at Heylesdon I can
non gete, and at Sueynesthorp I have take iiij. marc.
Item, as for tidyngs the Sescions schal be at Thetford on Wednesday next
comyng, where I undrestande Mr. Berney wol be with moche people, be
cauce ther is come to hym a Prevy Seale that he schuld be with the Kyng
within vj. dayes that the Prevy Seale whas delyverd hym, weche he can
not doo, for the vj. day is to morwe. Ther is on comen to Felbrigge, to
William Yelverton on other, and to Robert Rough an other, and non of
them wol goo to the Kyng; and the Undrescherif tolde me that ther is
comen a comyscion doun to hes maistre, that in cas they come not up to
the Kyng be ther Prevy Seales, that than he rere the contre and take hem
and bryng hem to the Kyng wher so ever he be.
Item, Jamys Gresham tellethe me the same, and as for tidyngs fro London
we here non, but that John Colman telleth me that if Berney or Robert
Rough come up they are like to die.
Ther be come to London Embasetors from the Duke of Burgundy, weche
cauced the Kyng to spede hym the rather to London.
Item, as for any newe assises at Thetford ther is non but that hathe
hanged this v. yere, as the Scherif tellethe me.
I whas purposed to be at home this nyght tell I had your bille, weche
cauceth me to ride on to Drayton for divers thyngs, &c. Almyghty Jesu
preserve you.
Wreten at Norwiche, the ij. Munday of clene Lente.
Your pore beedeman and servaunt,