_To my right worshipfull mayster, John Paston, at Castre, in Norfolk._
[Sidenote: 1464 / JAN. 26]
After due recomendacion hadde, please it your maistership to wytte that
this day the plee by twene Ogan and yow was sore argued in the Kynggs
Bench by your counsell, in lettyng of the jugement, and to morwe have
they day to argue ageyn. And for lak of copies of the plee, I am fayn to
sewe for newe copies therof for your counsell. Your counsell hopeth to
do weel therin. These argued for yow, Maisters Grenefeld,[88.2]
Catesby,[88.3] Pygot,[88.4] Notyngham,[88.5] and Starky,[88.6] &c. And
yesterday was the matier by twene Debenham and yow called by Geney[88.7]
for an answer. I have spoken onto Catesby, and delyvered hym your
enfromacion, and to be advysed, and to commune with Maister Grenefeld,
&c.
The two Chefe Juges[88.8] and Maister Lyttleton[88.9] arn awaytyng up on
the Kyng, for the Kyng is purposed in to Gloucestreshire, &c.
It is seid that my Lord Chaunceller[89.1] shull be here on Saterday or
on Moneday next comyng, as the maisteres of the Chauncerye sayn. I write
to yow this by cause ye seid to me if ye wyst that my Lord Chaunceller
shuld be here, thanne wolde ye come hidder, and ell[es] wolde ye not
come here this terme.
As touchyng Rysyng, he hath his day, Utas[89.2] Purificationis, but I
have that weye that his presence is recondet for al this terme.
Maister Clement[89.3] tellyth me that Wysseter hath put excepcion on to
your wyttenesseres,[89.4] &c.
It is seid that the Kyng wold ride Sussex, Kent, Essex, Suffolk, and
Norffolk, and so to the Parlement, for he hath sent for alle his feed
men to awayte up on hym in their best aray in al hast.
Wretyn at London, the Thursday in the morwe after Seynt Poule.
Your owen poure man,