_To my ryth worchepfull husbond, Jon Paston, be thys lettyr delyveryd in
haste._
[Sidenote: 1462-3 / DEC.]
Ryth worchepfull husbond, I recomand me to yow. Plesyth it yow to wet
that Jon Jeney was here with me thys daye and told me that ye desyiryd
that I shold do make a dyche at Heylysdon, and the seson is not for to
do make no new dechys, nor to repare non old tyll it be aftyr Crystmas,
as it is told me, and so I sent yow word in a lettyr more thane a
monythe goo; I wot not whedyr ye had the lettyr or not, for I had non
answer ther of fro yow. Jone Dyngayne recomandyth hyr to yow, and
prayith yow for Goddys sake that ye wole be hyr good mastyr, and that ye
wole wychesave to spek to Hwe of Fen for hyr, for it is so that serteyn
lyvelod whyche hyr husbond had in Engham was cast in the kyngys hand in
hyr husbandys lyve, and, as she undyrstandyth, it was do in hys fadyrys
lyve; of the whyche hyr husband spok to Hwe of Fen ther of in hys lyve
to helpe that he myth be dyschargyd ther of, and Hwe of Fen promysyd hym
verily that he had mad an ende ther in and dyschargyd hym, and that he
shold never be hurt nor trublyd ther for; and now the laste wek Barnard
the undyr scheryfe sent downe a warant to sese the lond for the Kynge,
and so, but [_unless_] he have xx_s._ for a fyne within shorte tyme he
wol not suffyr her to have the avayle of the londys. Wher fore she
prayith yow, for Goddys sak, that ye wole purvey a mene that Hwe of Fen
may save hyr harmles, in as myche as he promysyd hyr husbond to purvey
ther fore in hys lyve; and if it plese not yow to spek to hym ther of,
that it plese yow to do John Paston or Thomas Playter or sume othyr,
that ye thynk that cane undyrstande the mater, for to spek to the seyd
Hwe of Fen ther of in hyr name, and to serge the kyngys bokys ther fore,
if ye thynk that it be for to do, and sche woll ber the cost ther of. As
for the mater that ze wold I schold spek to Wylliam Worcester of
towchyng the false forgyd evydens, I can not spek with hym yet; hys wyfe
seyth allwe that he is oute when that I send for hym. Yowyr fermore of
Sweynysthorpe hathe fownde suerte for yowyr dute, as Rychard Calle
tellyth me, so that ye scholl be plesyd when ye come home. And the
blyssyd Trinite have yow in Hys kepyng. Wretyn in hast on the Monday
next aftyr Seynt Andrew.
By yowyr,