_To my ryght worchipfull hosbond, John Paston, be thys letter delyveryd
in hast._
[Sidenote: 1463 / NOV. 13]
Riht worchepfull husbond, I recommand me to you. Please you to wete that
I was at Norwic this wek to purvey suche thyngs as nedythe me ageyns
thys wynter; and I was at my modder, and wille I was ther, ther cam in
on Wrothe, a kynnysman of Elysabet Clers, and he sey your dowter, and
preysyd hyr to my moder, and seyd that she was a goodly yong woman; and
my moder prayd hym for to gett for hyr on good mariage yf he knewe any;
and he seyd he knewe on shuld be of a CCC. mark be yer, the wyche is Sir
John Cley son, that is Chamberleyn with my Lady of York,[83.2] and he ys
of age of xviij. yer old. Zyf ye thynk it be for to be spok of, my moder
thynkyth that it shuld be get for lesse mony nowe in thys world than it
shuld be her after, owthyr that j. [_one_], or sum other good mariage.
Item, I spake with Master John Estgate for Pekerynes mater after your
entent of the mater of the letter that ye sent home, and he seyd to me
he shuld write to yow howe he had don ther in; and so he sent you a
letter, the wyche was sent you be John Wodows[84.1] man with other
letters.
As for answer [of] other mater, Daubeney tellythe me he wret to you.
I be seche Alle myghty God have you in Hys kepyng. Wretyn at Caster, the
Sonday next after Seynt Marteyne.