_To my worcheppefull master, Master Paston the heldest._
[Sidenote: 1463(?)]
Ryth worchepfull master, I recommend me on to zowr masterchepe. And of
on mater at reverens of God take hede, for in trowth I her meche talkyng
therof, and that is both in Norffolk, Suffolk, and Norwyche, among halle
men of worchepe, as welle that love zow as oder, and that is of my
master, your son, Syr Jon, causse he is so at home, and no noderwyse set
for. Summe sey that ze and he both stond howth of the Kyngs good gras,
and summe sey that ze kepe hym at home for negard chepe, and wyll no
thyng ware [_spend_] up on hym; and so heche man sey is avyse as it
plese hem to talke. And I have hanqwerryd [_inquired_], and seyd the
most cause is inparty for cause ze har so meche howte, that he is the
rather at home for the save gard of the costs. But at the referens of
God, excheuyng of common langage, se that he may worchepfull be set for,
heyder in the Kyngs servyse, or in maryache; for as towchyng the Lady
Chaberlen[82.2] that mater is don, for I spake with the parson therof,
and I hard be hym that that mater wyll not pre [_proceed ?_].
No more, but God spede zow as well in all maters, as I wold ze xuld do,
I be seche zow that this leter be kept secrete.
Be zow[r] bede man,