_To the ryght worcheppful Sere John Paston, Knyght, be this delyvered._
[Sidenote: 1463 / SEPT. 4]
Ryght worchepful ser, and tendyrly belovyd in our Lord God, I comend me
to you, sendyng you knowyng that I dede your erand to my brother, the
persoon of Blofeeld, on Wednysdaye was sevenyght, after the
undyrstandyng that I had of you and from you be this brynger; whech man
I felte ryght wele and favorabelye dysposyd to you ward, and more
favorable wole be than to ony other jentylman levand, the wylle of the
dede performyd, and his conscyens savyd; and more thinges seyd
favorabely for yow which I entytelyd in a scrowe to a’ certyfyed to your
servaunt Calle, yf he had come, as ye sent me woord he sculd ado, and
xuld, as ye behestyd me, abrowte me our ferme for Heylesdon, which not
don, causeth me to wryte, prayng your jantylnesse that I send no more
therfore, for it is unpayed for the zeer afore the Halwemesse that my
Mayster Fastolf deyed, and for the same zer that he deyed in, and sythen
for ij. zer, and v_s._ unpayed of a zer, and come Myhelmesse nexte xal
be another zer unpayed. Thus is iiij. zer unpayed and v_s._, and at
Myhelmesse next xal be v. zer and v_s._
This thus kepte from Holy Chirche that is Holy Chirchez good, may not be
withoute grete parelle of soule; wher the parelle is God knoweth, I pray
God amend it, and geve hem grace that have his goods so to dyspose them,
that thei and the dede both may be oute of parelle. And the Trynyte have
you in His mercyful kepyng. Wretyn at Langle, on Soneday, at evyn late,
next after Seynt Johne Daye Decollacion.[81.2]
Be your welewylland,