_To my right worchepful hosbond, John Paston, be this letter deliveryd
in hast._
[Sidenote: 1463 / JAN. 19]
Right worchepfull hosbond, I recommand me to you. Please you to wete
that I received a letter frome you on the Sonday[65.4] next after
Twelfthe day, weche was sent be a prest of Seynt Gregorys paryche of
Norwic; and wher as ye mervaylyd I sent you no wrytynggs of suche
letters as ye sent me be for, I sent you a answer of the substauns of
suche maters as ye have wretyn of me be for (be Playter), the weche he
told me a sent hem to you to London. And as towchyng the erands that ye
sent to me for to do to Richard Calle, I have do as ye command me to do,
and callyd upon hym therfor, bothe be for your writyng and sithyn; he
thar have non excuse for defaute of leyser, for he hathe be but ryght
litill her syn ye departyd hens. He is owght at this tyme, and whan that
he comythe home I shall make hym make yow a cler bylle of the receyt of
your lyvelod, and Fastolf bothe; and I shale send yow a cler bylle of my
receyts, and also of my payments owght thereof ageyn; and as for suche
erands that shuld be do to Sir Thomas Howys, I have shewyd Richard Calle
your writyng, and told hym your entent, as for suche thyngs as ye wold
he shuld sey to hym on hys none heed. Also I have do your erands to my
moder and to my cosyn Cler[66.1] after your writyng. Item, I have spoke
to John Adam and to Playter of your entent of the last bylle that ye
sent me, and they sey they wolle do after your entent as moche as they
may, and ye shall have a answer therof in hast.
Item, Sir Robert Coniors dinid with me this day, and shuyd me a letter
that came frome the Kyng to hym, desyryng hym that he shuld a wayt upon
hys welle be lovyd broder the Duke of Suffolk, at Norwiche, on Monday
next comyng, for to be at the alection of knyghts of the chyer
[_shire_]; and he told me that every jentylman of Norffolk and Suffolk
that arne of any repetacion hathe writyng from the Kyng in lyke wyse as
he had. I felle hym be his seyyng that he ys right welle disposyd to you
ward; he seythe ther shall no man make hym to be a geyns you in no
mater. Skypwith shall telle you suche tydyngs as bethe in this contre,
and of Thomas Gornay and of his man; hym self is clerk convicte, and hys
man is hangyn; ye shall here her after what they and oder wer purposyd
to a do to her master.
I thank you hertely of your writyng to me be for that John Paston came
home, for God knowith I thowght right longe tyle I hard frome you;
I shalle send word in writyng of suche tydings as we have her on Monday
in hast. Daubeney deseyryht to wet what tyme that it please you that he
shuld come ageyn to you.
My moder and many other folkys makyth moche of your son John, the elder,
and right glad of hys comyng hom, and lekyth reght welle hys demenyng.
Heydon[67.1] son hathe bor owght the syyd stowtly her this Critstemes,
and whan that he rydyth, he hathe iiij. or v. men with hym in a
clothyng; but he hathe but lytyl fafor in this contre but yf [_unless_]
it be of the Bischop[67.2] and of the Prior of Norwic.[67.3] The seyd
prior hathe grauntyd hym the stewerdchep that hys feder had . . . .
. . . he hathe it under the Covent Seals, and Spylman,[67.4] his tutor,
to lerne hym howe he shuld be demenyd . . . . . . . it is seyd abowght
Bakynstorp that Herry Heydon shuld a seyd that it wer welle do that men
of the . . . . . . shuld make redy her [_their_] bald batts[67.5] and
her clot shon[67.6] and go feche hom her knygts of chyer [_shire_] . . .
. . . . . Barney; and it is promysyd hym that he shall be met with be
cause of hys langage . . . . . . . . . us a good world and a pesybyll.
I shall purvey for all thyngs that ye have sent to me for, so that I
ween ye shal be pleasyd. The blyssyd Trinite have you in Hys kepyng.
Wretyn in hast, the Wednysday next . . . . Seynt Agnet.
Your,