_To my right honorabil and worshypfull maister, my Maister Paston._
[Sidenote: 1462 / SEPT.]
Please it youre worshipfull maistyrshyp to wete, that it is informyd me
thys day scretly, that there is dyrected out a commyssion to mayster
Yelwyrton and maister Jenney, which shall tomorwyr syttyn be vertu of
the same at Seynt Oleffes;[51.3] and the substaunce of jentilmen and
yemen of Lodyngland be assygned to be afore the seyd commesyoners; and
it is supposed it is for my maisters londs, for as the seyd persone
informyd me, the seyd comesyoners have been at Cotton, and there entred,
and holdyn a court. I can not informe youre maystyrship that it is thus
in serteyn, but thus it was told me, and desyryd me to kepe it secret;
but be cause I conseyve it is ageyn your maistyrship, it is my part to
geve you relacion thereof.
I sende you a letter which cometh from Worcestyr[52.1] to my maister
youre brothyr. I wold ye undyrstod the intente of it, for as for
Worcester, I knowe well he is not good. Sum men ar besy to make werre,
for p’[52.2] the absentyng of my maister, the parson comyth not of hyse
owyn mocyon, but I wold youre maistyrship knewe be whom it is mevyd.
I herd you never calle hym false pryst, be my trouth, nor other language
that is rehersyd hym, but Gode sende a good accord, for of varyaunce
comyth gret hurt of tyn tyme, and I beseche Jesu sende youre maistyrship
youre herts desyre, and amende hem that wold the contrary.
Sir, yesterevyn a man came from London, and he seyth, the Kyng cam to
London on Satyrday, and there dede make a proclamacion that all men that
were be twyx lx. and xvj. shuld be redy to wayte upon hym whan so ever
they were callyd; and it is seyd, that my Lord Warwyk had sent to the
Kyng, and informyd hyse Hyghnesse that the Lord Summyrset had wretyn to
hym to come to grace; but of the fleet of shyppis there is no tydings in
serteyn at London on Monday last past.
Youre bedman and servaunt,