_To myn ryght worshipfull and ryght singler good mayster, myn Mayster
John Paston._
[Sidenote: 1462 / MAY 4]
Myn ryght worshipfull mayster, I recomaunde me to yow in myn ryght
homble wyse. And please your maystership that I have ben at Wetyng and
there hald the court and lete on Hokmonday[39.2] as hit hath bene of
olde tyme accostomed; and the tenauntes have attorned and bene full
gladde that myn lady shuld rejoyse hit and kepe here possession. The
priour of Bromhill that was fermoure his terme is expired, and wole sewe
to myn lady and hir councell to have a newe terme; but lete myn lady be
ware, for, as I here seyn, he bydeth but a tyme that he myght gete a
summe of money to geders of myn ladyes lyflode, and to gone ther
with[39.3] a love of his sojornyng as yette in Hokehold. She hath bene
dreven fro town to town for his sake. Hit is wele done ye advertyse myn
lady, if she be in that cas that she hath governaunce of hir owen
londes, that she do no thyng to that lyflode ner non other in Norffolk,
with ought advyse of theym that have vysyted and overseen theym; for
there hath bene straunge rewle, bothe in woodsales and sale of londes
helde at wylle for fre rent, as ye shal knowe here after. Thoresby,
a man that was generall attorney for myn Lord Oxenford that was, told me
that the Kynge hadde made Keche generall receyvoure by priveseale of
alle londes that were the Erle of Oxenford and Dame Elyzabet, ecept tho
that Howard hadde entered and Lanham and an other graunted to Wykes, and
certeyn lyflode in Kent that was assigned to the tresorer of howshold of
the Kynges hows; and she shuld have be Keches hande v.^c. [500] mark,
ij.^c. and l. [250] mark to bene payed at this Estern and the remulant
at Mihelmasse. And of the remulant the Kyng shuld be answered. Ye shal
sone understande how it is; and if hit be so, hit [is][39.4] but foly to
laboure any ferther. I wold fayn knowe, for the courtes for the half
yere wold bene holde for nede. And our Lord be with youre maystership
and sende yow th’accomplyshement of youre noble desyres. Wreten hastely
at Norwyche, the iiij^te day of May.
Youre servaunt to his power,