_To the rigth reverent and worshipfull sir, and my right honourable
maystyr, John Paston._
[Sidenote: 1462 / APRIL (?)]
Right worshipfull sir, and my right honourable maistir, I recomaunde me
to you in my most humble wise. And plese it youre good maistirshyp to
wete that it is seyd here that my Lord Worcestre is lyk to be Tresorer,
with whom I truste ye stonde right wel in conseit, with whiche God
contynwe. Wherfor I beseke youre maistirshipp that if my seid Lord have
the seid office, that it lyke you to desyre the nomynacion of on of the
officez, eythyr of the countroller or serchorship of Jernemuth, for a
servaunt of yowrez, and I shuld so gyde me in the office as I truste
shuld be most profit to my seyd Lord. And if youre maistirshyp lyked to
gete graunt thereof, that than it plesyd you to lycense on of youre
servaunts to take out the patent of the seyd office; and if it cost v.
or vj. or viij. marke, I shal trewly contente it ageyn; and yeerly as
longe as I myght have the officez, or any of hem, I shal geve my maister
youre sone v. marke toward an haukeney.
It shuld be to me right a good mean to stondyn as well in the trust as
in the conseyt amongs marchaunts, with whom and with alle men I calle
myself a servaunt of yourez, and soo wil do, if it plese you, which
boldyth me the more to calle upon youre right wurshipful maistyrshyp in
this mater, where in I beseke you to forgeve me my boldneyse in thys
behalve. And if I knew that my Lord shuld have the office in sertayn,
than I wold wayte upon youre good maystyrshyp there to opteyne the
patent, if it plesyd youre good maystirship to gete me the graunt, &c.
No more on to you, my right honourable maister, at thys tyme, but Jesu I
beseke sende you a good conclucyon in all yore maters, and graunt you
ever youre herts desyre.
Yore contynwal servaunt and bedeman,