_To my right trusti and welbelovid frend, John Paston, Esquier._
[Sidenote: 1462 / MARCH 25]
Right worshipfull, and myn enterly welbelovyd frend, I recomaund me un
to you, hertely thankyng you of your gret present of fisch, and of the
felyshipp that my cosyn your sonne shewid unto me att Norwiche,
purposyng be the grace of God to deserve it un to you in tyme to come,
in such place as I may do for you.
Desiryng you specyally, wher as a tenaunt of myne of Lavenham, called
John Fermour, is sesid and arestid with in the towne of Yermowth, be
cause he dwellid with the Erle of Oxonfords son, and purposid to have
passid the see withou[t] lycence, and stondyth out of the conceyte of
much peple, I wold desyre you, that ye wold wryte to the Baylyffs of
Yermouth to delyver the seid John Fermor to my servaunt John Brenerigg,
brynger of this, with an officer of the seid Towne, to be caried unto
the Kyngs Castell of Rysing at my cost; ther to be examynid of certeyne
Artycules, which I may not disclose, til I have spoke with the Kyngs
Highnes: praying you to wryte to the seid Bayliffs, that I shall be her
suffisant discharge ayenst the Kynge. Desyryng yow to geve credence to
the brynger herof, as my verray trust is in yow.
Wretyn at Lavenham, the xxv^th. day of Marche.
Your trew and feithfull frend,
havyng no blame for my gode
wylle.