_To myn ryth reverent and worschypfull fader, John Paston, beyng in the
Inder Temple._
[Sidenote: 1462 / MARCH 13]
Ryght reverent and wyrshypfull fader, I recomand me un to you, be
sychyng you of your blessyng and gode faderhode. Pleasyt it you to
understond the grete expens that I have dayly travelyng with the Kyng,
as the berour here of can enfourme you; and howe long that I am lyke to
tary here in thys country or I may speke with you a gayn, and howe I am
chargyd to have myn hors and harnys redy, and in hasty wyse, besykyng
you to consyder theys causes, and so to remembr me that I may have suche
thynges as I may do my mayster servys with and pleasur, trusting in God
it schall be to your wyrshyp and to myn and vayll [_avail_]. In
especiall I besyche you, that I may be sur where to have mony somwhat be
fore Estern, other of you, or by myn uncle Clement, when nede ys. Of
othir causes the berour hereof can enfourme you. No more to you at thys
tyme, but God have you in Hys kepyng.
Wryten at Stamford, the xiij. day of March.
Be yowr sone and servant,