_To my ryth worchepfull husbond, John Paston, be this delyveryd in
hast._
[Sidenote: 1462 / MARCH]
Plesyth yow to wete that John Wellys and his brodyr told me thys nyth
that the Kyng lay at Cambryge as yestyrsnyth to Sandwyche ward, for ther
is gret dyvysyen be twyx the Lordys and the schypmen ther, that causyth
hym to goo thedyr to se a remedye therfor.
I thank God that John Paston yed non erst [_went no earlier_] forthe,
for I trust to God all schall be do er he comyth. And it is told me that
Syr John Howard is lek to lese hys hed.
If it plese yow to send to the seyd Wellys, he schall send yow mor
tydyngys than I may wryt at thys tyme. God have yow in Hys kepyng.
Wretyn in hast at Thetford, at xj. of the clok in the nyth, the same day
I departyd fro yow.
I thank Pampyng of hys good wyll, and them that wer cause of changyng of
my hors, for they ded me a bettyr torne than I wend they had do, and I
schall aquyt them anothyr day, and I maye.