[Sidenote: 1462 / FEB. 9]
Right trusty and welbeloved, I grete yow hartily well, and will ye wite
that where hit is so, that Sir John Fastolf, whom God assoyle, with
other, was sum tyme by Sir Herry Inglose enfeffed of trust of his maner
offe Pykewurthe in Rutlande, the which made his wille, proved, that the
seid maner sholde by solde by Robert Inglose and Edmunde Wychingham his
executours, to whom the seid Sir John hath relesed, as his dute was to
do; now it is so that for John Browne[31.1] ther is shewed a dede under
seall of armes berynge date byfore his reles made to the Duke of
Norffoke, Henry Inglose and other, contrarie to the wille of the seid
Sir Herry and the trust of the feoffement that the seid Sir John
Fastolff was infeffed inne. And a letter of Attorney under the same
seale of armes to yow, to deliver seison acordynge to the same
feffement, to the gret disclaundre of the seid Sir John and all his, yef
this be true. Wherfore I preie yow hertili that ye feithfully and truly
rescribe to me in all the hast ye may what ye knowe in this mater such
as ye wull stonde by with outen glose, and how ye can imagine that this
crafte shulde be practised, and specially whether ye yourself delivered
seison in Rutlond or noo. And this and what incedentes ye knowe, I preie
yow by wrytinge certefie me in all hast, that I may be the more ripe to
answer to this, to the wurship of the seid Sir John, that was your
maister, so that thorowh your defaute your seid maisters soule ther for
lie not in perell, but this disclaundre may be eesed and cesed as reson
requireth, to the wurship of hym and all that longe to hym. And this I
pray yow faile not offe as I truste yow. Wret at Londo[n] the ix. day of
Februar.
Yowr frend,