_To the ryght reverent and my mooste worschipful master, my Master John
Paston, in the Inneer Tempyll._
[Sidenote: 1462 / FEB. 1]
Plesith it your maisterschip to witte that I have been at Burnewyll in
Nacton to receyve the rentes and fermys of the tenauntes. And I
undrestande be them, and be Robert Goordon that Mastre Jenney whas there
and helde a coorte on the Mondaye next aftre Tlwelthe, and warned the
tenauntes that they schulde pay no money to no man onto the tyme they
had worde from hym, seyng that he whas on of the feffeys of the same
maner, and that he whas feed with Sir John Fastolff, of weche fee he was
be hynde for ij. yere; wherfore he desired the tenauntes that they
schulde not be redy in payement onto the tyme they had word from hym,
but that he myght be payed of his seide fee, lyke as the wylle of the
deede was. Wherfore I can gete no money of them unto the tyme they have
knowleche how it stond be twyx your maistership and Mr. Jenney; for
withoute Jenney write to hem or come hom ward that wey, and have the
tenauntes together and lete hem witte that ye ought to have the rentes
and fermes of the seid maner, I can not see that ye be like to have but
litell money there, withoute ye woll do distreyne throuout all the
lordeschip. I have sette dayes to purvey but [_their_] money ayenst the
first weke of cleene Lenton, and than they schul have an answere who
shal receyve it. Wherfore that it please your maistership to remembre to
speke to Mastre Jenney. The blissed Trinite preserve you and kepe you
from all advercyte. Wreten at Yebbyshep[30.1] the furst daye of
Februare.
Your pore servaunt and bedman,