_To my ryght worchepful modyr, Margaret Paston._
[Sidenote: 1476 / JAN. 21]
Aftyr all dewtes of recomendacyon, pleasyt yow to weet that as yesterday
att noon my brodyr Sir John departyd fro Norwyche towardes London; for
as now all the sped is with the Kyng for the swerte of the maner of
Caster, consyderyng the dyeing seasyd of my Lord of Norffolk. He
trustyth to be in thys contre ayen with in x. or xij. dayes. And at hys
departyng he seyd to me that ye sent hym woord to selle the clothe of
gold, if he myght selle it well, whyche clothe I thynke may be sold, iff
ye wyll agre; not withstandyng I wylle make no bargayn for it, tyll ye
send me woord of the serteyn some what ye wyll have for it, or ellys ye
to have it ayen. Sir Robard Wyngfeld offyrd me yesterday xx. mark for
it, but I wot well ye shall have more for it, if ye wyll sell it; wher
for, as ye wyll deele in this mater, I prey yow send me woord to morew
be tymys, for if thys bargayn be forsakyn, I trow it wyll be longe er ye
kan get an other bargayn to selle it eny thyng aftyr that is woorthe.
Modyr, in as humbyll wyse as I can, I beseche yow of your blyssyng.
I trust fro hense foorthe that we shall have our chyldyr in rest with
ought rebwkyng for ther pleying wanton; for it is told me your ostass at
Freton hathe gotyn hyr syche a thyng to pley with, that our other
chyldyr shall have leve to sporte theym. God send hyr joye of it.
Wretyn at Norwyche, thys Sonday.
Your sone and humbyll servaunt,