_To Mestresse Margret Paston, at Norwyche._
[Sidenote: 1475 / SEPT. 11]
Ryght reverend and my most tendre and kynde moodre, I recomaunde me to
yow. Please it yow to weete that, blessyd be God, thys wyage of the
Kynges is fynysshyd for thys tyme, and alle the Kynges ost is comen to
Caleys as on Mondaye last past, that is to seye, the iiij. daye of
Septembre; and at thys daye many of hys host be passyd the see in to
Inglond ageyn, and in especiall my Lorde off Norffolk and my bretheryn.
Item, I was in goode hope to have hadde Caster ageyn. The Kynge spake to
my Lorde off Norffolk for it, and it was full lyke to have comyn; but in
conclusyon it is delayed tyll this next terme, by whyche tyme the Kynge
hat comaundyd hym to take advyce off hys councell, and to be sywer that
hys tytle be goode, or ellys the Kyng hathe asserteynyd hym that for any
favor he most do me ryght and justyce, &c.
And iff Caster hadde comen, by my feythe I had comyn streyhte home.
Notwithstondyng, iff I may do yow servyce or eese, as ye and I have
comonyd heer to foor, aftre as I heer from yow, as God helpe me,
I purpose to leeffe alle heer, and come home to yow, and be yowr
hosbonde and balyff; wher in I spake to my brother John to telle yow
myn advyce.
I also mysselyke somwhat the heyr heer; for by my trowte I was in goode
heele whan I come hyddre, and all hooll, and to my wetyng I hadde never
a better stomake in my lyffe, and now with in viij. dayes I am crasyd
ageyn. I suppose that I most be at London at Mychelmesse, and ther to
purveye for payment for myn oncle William, by whyche tyme I praye yow
that I may heer from yow and off yowr advyce and helpe, iff any thynge
be growyn off Sporle woode. For had nott yit that danger have been,
I mygh yit have ben at home with yow at thys daye, or with in vij. dayes
aftre. No more, but I beseche Jesus have yow in kepyng.
Wretyn at Caleys, the xj. daye of Septembre.