_To John Paston, or to hys brother Edmond Paston, at the George, at
Powles Wharf._
[Sidenote: 1475 / JUNE 13]
Brother Edmonde, it is soo that I heer telle that ye be in hope to come
hyddre, and to be in suche wages as ye schall come lyve lyke a
jentylman, wheroff I wolde be gladde. Wherffor, for yowr better speede,
I lete you weete that Heugh Beamond is deed; wherffor I wolde ye had hys
roome nowe or never, iff ye can brynge it abowt; ellys iff ye dispose
yowe to abyde in Inglonde, syns it is so that the Bysshop of
Lynkolne[235-2] is Chaunceler, hys servyse is the meter for yow; he is
next neyghbour to Norfolk off any astate. God sende yow some good warde
of hys.
I praye you, iff yowr leyser be ther aftre to remembre Towneshende, that
he, with the advyse and assystence of my Master of the Rollys,[235-3]
have one daye off marche with the slawe Bysshop of Wynchester, that he
maye kepe me hys promyse, that is to seye, to entrete the Duke and
Duchesse of Norffolk for Caster. He promysed to doo it, and to ley owt
an C_li._ for the same.
Item, I praye yow sende me some tydynges within v. dayes aftre that ye
see thys bylle.
Wretyn at Caleys, the xiij. daye off June.