_Monseigneur Jehan Paston, chevalier d’ Engleterre._
[Sidenote: 1473 / AUG. 28]
Mon treschier et honnore seigneur, je me recomande a vous outant que je
puis ne scay. Et vous plaise savoir que je ay oy novelles de vous par
ung de vo marchans de Calais touchant unne armura de unna sella que je
vous doy, et de una barbuta, laquelle est en diferansce entre vous et
moy, de laquelle je vous ay aultre foix dist que je estoie contant de
fere toute rexon [_raison_], et en quore le vous dige prexentement que
je suis prest de fer tout chou qu’il apartient en tout rexon, set
[_c’est_] asavoir de la barbute et de l’armura de sella. D’aultre chiox
ne vous suis en riens tenut, forque en toute les chiox que me seroint
posible de faire pour l’amour de vous a vostre honneur et a vostre
profit, je suis tout jour prest a vostre comendement.
Item, en houltre, je ay entendut que vous voulles avoir unng harnax
complet. Com je prins vostra mexure dernierement quant vous fustes en
ceste ville de Bruges, saichies que je ay en quor vostre mexure de
toutes lez piesces; pour quoy, se il vous plaist que je la vous fasa, je
la vous faray de bon ceur, et tout cella que il vous plaira avoir fait;
et au regard du pris, je faray tellement que vous seres content de moy
pour tant quant il vous plaira lesiem savoir queles piesses que vous
voles avoir, et la faisson et le jour que vous la voles avoir par
quelcun aqui je puis in chauder en nom de vous, et qui me ballia argant
de sus, je feray si bien que se Dieu plaist vous vous loeres de moy.
Aultre chiox ne vous say que mander pour le prexent, senon que je prie a
Dieu que il vous doint ce que vostre ceur desir.
Escript a Bruges, le xxviij. jour de Ahoust, l’an lxxiij.
Le tout vostre serviteur,
MARTIN RONDELLE,
Armurier de Monsire le
Bastart de Bourgogne.
_Endorsed_--Par Martyne Rowndell, armorer de Bruggys. Anno E. iiij^ti
xiij^{o}.
[Footnote 193-1: [From Paston MSS., B.M.]]
839