_To Sir John Paston, Knythe, be thys delyverid._
[Sidenote: 1472 / JUNE 5]
I gret zow welle, and send zow Godds blyssyng and myn, latyng zow wet
that I spakke with frends of myn with yne thys fewe days that told me
that I am leke to be trobyld for Sir John Fastolles goodes, the whyche
were in zour fadyrs possessyon, and as for me I had never none of them.
Where fore I pray zow send me a kopy of the dyssecharge whyche ze have
of my Lord of Wynchester that ze told me that ze had, bothe for my
dyscharge and zowyrs wat sum ever that be callyd upon of eyther of us
here after. Item, yt ys told me that Harry Heydon hat bowthe [_bought_]
of the seyd Lord bothe Saxthorpe and Tychewelle, and hathe takke
possessyon there in. We bette the busschysse and have the losse and the
disworschuppe and ether men have the byrds. My Lord hathe falsse
kownselle and sympylle, that avyseythe hym thereto; and as yt ys told
me, Guton ys leke to goo the same wey in hast. And as for Heylysdon and
Drayton, I trow yt is ther yt schalle be. Wat schalle falle of the
remnaunt, God kowythe,--I trow as evelle or whersse. We have the losse
among us. Yt owythe to be remembyrd, and they that be defawty to have
konsyens there in. And so mot I thryve, yt was told me but latte that yt
is seyd in kownselle of them that ben at Caster, that I am leke to have
but lytylle good of Mauteby yf the Duke of Norfolke have possessyon
stylle in Caster; and yf we lesse that, we lesse the fayereste flower of
owr garlond. And ther for helpe that he may be owte of possessyon there
of in haste be myn a vyse, wat so ever fortune here after. Item, yt is
seyde here that my Lord Archebysschoppe is ded; and yf yt be so, calle
up on hys sueretes for the mony that is owyng to us, in hast be myn
avyse; and at reverens of God helpe that I mythe be dyschargyd of the C.
mark that ze wet of, owder be that mene or sum other, for yt is to myche
for me to bere, with other charges that I have besyd, that I am to hevy
wan I thynk up on yt. As for your syster Anne, Master Godfrey and his
wyffe and W. Grey of Martyn, arn up on a powntment with me and your
brother John, so that ze wylle a gre there to and be her good brother;
sche schalle have to joyntor hys modyrs lyvelod after the dyssese of her
and her husbond, and I to pay x_li._ be zere to the fynddyng of her and
her husbond tylle c_li._, be payed. And yf hys grawntsyers lyvelod falle
to hym here after, he hathe promysed to amend her joyntyr. Master
Godfrey hathe promysyd hym for hys parte xl_s._ be zere, and than
lakkythe but iiij. nobyls of xx. mark be zere, the wyche they hope ze
wylle make upe for zour parte. Wylliam Grey told me he schuld speke with
zow here in wan he kam to London thys terme. God kepe zow.