_To my ryght worchepfull brodyr, Syr John Paston, Knyght, be thys
delyveryd._
[Sidenote: 1472 / JAN. 23]
Ryght worchepfull syr, I recomand me to yow in my best wyse, lykeyth yow
to wet[132-2] that I have thys day delyveryd yowr mantyll, yowr ray
gowne,[132-3] and yowr crosbowys, wyth telers and wyndas, and yowr
Normandy byll to Kerby to bryng wyth hym to London.
Item, in eny wyse, and [_if_] ye can axe the probate of my fadyrs wyll
to be gevyn yow wyth the bargayn that ye make wyth my Lord of
Canterbery, and I can thynk that ye may have it, and as soone as it is
prevyd ye or I may have a lettyr of mynystracyon upon the same, and a
qwetance of my Lord Cardinalle evyn foorthe wyth; and thys wer one of
the best bargaynys that ye mad thys ij. yer I enswyr yow, and he may
make yow aqwetance or get yow one of the Bysheop of Wynchestyr for Syr
John Fastolfys goodes also, and in my reson thys wer lyght to be browght
a bowght with the same bargayn. And ye purpose to bargayn with hym ye
had need to hye yow, for it is tolde me that my Lord of Norffolk wyl
entyr in to it hastyly, and if he so doo, it is the wers for yow, and it
wyll cawse them to profyr the lesse sylvyr.
Item, I pray yow send me some secret tydyngs of the lyklyed of the world
by the next messenger that comyth between, that I may be eyther myryer
or ellys mor sory then I am, and also that I may gwyd me ther aftyr.
Item, as for Sir R. Wyngfeld, I can get no x. _li._ of hym, but he seyth
that I shall have the fayirest harneys that I can bye in London for
sylvyr, but money can I non get. I can not yet make my pesse wyth my
Lord of Norffolk nor my Lady by no meane, yet every man tellyth me that
my Lady seyth passyngly well of me allweys notwithstandyng. I trowe that
they wyll swe the apell[133-1] thys term, yet ther is no man of us
indytyd but if it wer doon a for the crowners er then we cam owt of the
plase; ther is now but iij. men in it, and the brygges alwey drawyn. No
mor, but God lant yow myn her.[133-2]