_To my most honorabl and tendre modre, Margrete Paston, be thys letter
delivered._
[Sidenote: 1472 / JAN. 8]
Most worschypfull and kynde moodre, I comande me to yow, and beseche yow
off yowr dayly blyssyng and remembraunce. Please it yow to wete thatt I
have my pardon,[130-3] as the berer heroff can informe yow, for comffort
wheroffe I have been the marier thys Crystmesse, and have been parte
theroff with Sir George Browen,[131-1] and with my Lady myn aunte, hys
wyffe,[131-2] and be ffor Twelthe[131-3] I come to my Lorde
Archebysshope,[131-4] wher I have hadde as greete cheer, and ben as
welkom as I cowde devyse; and iff I hadde ben in sewerte that Castr weer
hadde ageyn, I wolde have comen homewards thys daye.[131-5]
. . . . . . . .
And I beseche yow to remembr my brother to doo hys deveyr thatt I maye
have agayn my stuffe, my bookes and vestments, and my beddyng, how so
evyr he doo, thoghe I scholde gyffe xx^ti scutes by hys advyse to my
Lady Brandon, or some other goode felawe.
As for any tydynges ther be noon heer, saffe that the Kyng hath kept a
ryall Crystmesse; and now they seye that hastelye he woll northe, and
some seye that he woll into Walys, and some seye that he woll into the
West Contre. As ffor Qween Margrett, I understond that sche is remevyd
from Wyndesor to Walyngfforthe, nyghe to Ewhelme, my Lady of Suffolk
Place in Oxenforthe schyre.
And men seye that the Lorde Ryverse schyppyd on Crystmesse evyn in to
Portyngale warde; I am not serteyn.
Also the schalle be a convocacion off the Clergye in all haste, whyche
men deeme will avayle the Kynge a dyme and an halffe, some seye.
I beseche God sende yow goode heele and greater joye in on year then ye
have hadde thys vij.
Wretyn att the Moor the viij. daye off Janever, A^o E. iiij. xj.
By yowr soone,