[Sidenote: 1471]
. . . . the very valew of Sporlewood passyth not C. mark of no manys
mony that I can spek with, and to be payid by dayis as the byll that
Jwde shall delyv[er] . . . rehers; and ther ayenst ye shold loose
iij_li._ of the ferme of the maner yerly, whych standyth by undyr wood;
and yet the fense must stand yow over on xij. mark by the lest wey; but,
by God, and I wer as ye, I wold not sell it for C. mark more then it is
woorthe. Syr John Styll recomandyth hym to your good mastyrsheppe, and
seyth pleynly if ye wyll he wyll com up to yow and awayte on yow
whersoever ye be, coort or othyr. By Seynt Mary, he is owyng more mony
than I wend; for he is owyng for a twelmonthe and a quarter at thys
Crystmas, savyng for hys boord, xij_d._ a wek for iij. quarters; and he
seythe pleynly that ye and R. Calle both bad hym syng styll for Syr John
Fastolf as he dyd before; but I have bodyn hym that he shall get hym a
servyse now at thys Crystmas; and so he shall, withowt that ye send hym
othyr wyse woord, or ellys that ye or I may get hym som benefyse or fre
chapell, or som othyr good servyse whych I praye yow enqwer for.
Item, and ye werk wysly your mater myght com in with othyr maters of the
lordes in ther apoyntmentes with the Kyng, but it wold be labord to a
porpose this Crystmas whyll ye have leyser to spek with your mastyr.
Item, myn aqweyntans with the Lord Revers is none othyrwyse but as it
hathe ben alweys; savyng and he go no to Portygall to be at a day upon
the Serasyns, I porpose and have promysyd to be ther with hym; and that
jorney don, as Wykys seythe, farwell he. He porposyth to go forward a
bowt Lent, but Fortune with hyr smylyng contenans strange of all our
porpose may mak a sodeyn change. I ensuer yow he thynkyth all the world
gothe on ther syd ayen; and as for my comyng up at the begynnyng of thys
next term, with owt ye send me othyrwyse woord that I myght do yow som
good when I wer com, by my feyth I com not ther, for it shold put yow to
a cost, and me to a labor and cost bothe; but [if] ye send for me I com
streyght, thow I tery the lesse whyll ther, and so I shall withowt I may
do yow som good. By my feythe I porpose to make up my byllys clere, and
send yow the copyse as hastyly as I can. Yonge Wyseman othyrwye callyd
Foole, told me that Sir W. Yelverton is abowt to make a bargayne with
the Dwches of Suffolk or with my Lord of Norfolk, whyche he may get
fyrst, for the maner of Gwton. I reseyve all yet, God hold it.
I praye yow recomand me to my brodyr Molyenewx, and all othyr good
felaws.