_Tho my rytgh wurshepfull brother John Paston, in hast._
[Sidenote: 1471 / NOV. 18]
Rygh wurshipful brother, I recumawnd me to zow, prayeng zow hartely that
ze wyl remembyr soche maters as I wryth to zow. I send zow now be the
brynggar her of mony, wycche mony I pray zow that [ye[121-3]] be stowe
yt as I wryth to zow. I wend a don yt my sylf but consyderyng costis and
other dyvers thyngis I may not bryng yt abowthe. Wher for I pray zow
hartely to take the labour up on zow, and I trust to deservyt. I pray
zow be stow thys mony thus: to Christofyr Hanyngton v_s._: to the
prynspall of Stapylin[121-4] v_s._ in parte of payment. Also I pray zow
to bye me iij. zerddis of porpyl schamlet, price the zerd iiij_s._, a
bonet of depe murry, pryce ij_s._ iiij_d._, an hose clothe of zelow
carsey of an ellyn, I trow yt wyl cost ij_s._; a gyrdyl of plunkket
ryban, price vj_d._; iiij. lacis of sylke ij. of one color and ij. of
ane other, price viij_d._; iij. doseyn poynttis wythe red and zelow,
price vj_d._; iij. peyer of pateyns. I pray zow late Wylliam Mylsant
purvey for them. I was wonte to pay but ij_d._ ob. for a payer, but I
pray zow late them not be lefte behyng thow I pay mor; they must be lowe
pateyns; late them be long inow and brode up on the hele. Among all
other I pray zow recumawnd me to Mastres Elyzabet Hygons. I may sey
poverte partes feleschepe. Yf that I had ben so well purveyde as I wend
I trowst to have ben with zow her thys; also I pray zow recumawnd me to
my brother Sir John. I fer lasse he wyl take a dysplesur with me that I
send hym no mony. I pray zow excuse me as ze can. I trust to send hym
sum a bowth Candylmesse. I had a promyse of Masteres Elyzabeth of a
typet of welvet; but and I myth have a hatlase I woold thynk me well.
I pray zow sey thus myche on zour owyn hed, and yf ze can not sped of
the hatlase I pray zow bye me one of xij_d._ or xvj_d._ Also Sir I send
Parkar hys mony be the brynggar har of and I have desyered hym to lend
me a gown of puke, and I have send hym a typet of welvet to boredyr yt
[round [122-1]] a bowthe; and I pray zow be at schesyng there of; and yf
that he wyl not be cryst calkestowe over hys hed that is schoryle in
Englysche, yt is a terme newe browthe up with my marschandis of Norwych.
Sir John Pampyng recummawnd hym to zow and pray zow that ze wyl remembyr
hys harnes, and yf that ze can get the mony he pray zow to delyver
Parkar x_s._ that he howyth hym. Also, sir, my modyr gretis zow wel and
send zow Goddis blyssyng and heres, and prays zow that ze wyl bye her a
runlet of Malmesey owthe of the galey; and yf ze have no mony sche byd
that ze schuld borow of my brother Sir John, or of sum other frend of
zowers, and send [he]r[122-1] woord as hastily as ze have it, and sche
schale send zow mony; and yf that ze send it home sche byd that yt
schuld be woond in a canivasse for brochyng of the caryars, for sche
sethe that sche hath knowyn men served soo befor. Also I pray zow, if ze
speke with Master Roger, tell hym that yf he cum in to thys cuntre thys
crystemas, he schal have hys x_s._, and yf that he cum not I schal send
yt hym be xij. day [_Twelfth Day_] at the fardest. I pray zow, hartely
remembyr my gere, and that ze wyl desyere Wylliam Mylsant on my be halve
to purvey for the caryage in as hasty wyse as yt can. Also I pray zow
that the welvet that levyt of my typet may be send hom a geyn, for I
woold strype a dobelet ther with. As for Masteres Blakenye, I trowe sche
in zour quarters. I woold I had the same entyrpryce up on hyr that John
Bramppton of Atylborowe had up on master Byrston. Alle the Coorte
recommawndes hem tow zow. I pray zow, and ze can get me any profytable
servyce, a saye. My brother Sir John was meved of my hawnt Ponyngges to
have ben with here. I woold have rytgh an hesy servyse tyl I were owthe
of detis. God have zow in Hys kepyng. Wretyn at Norwyche, the Monday nex
be fore Sen Edmond the Kyng.