I wolde ffayne have the mesur wher my ffadre lythe at Bromholm; bothe
the thyknesse and compase off the peler at hys hed, and ffrom that the
space to the alter, and the thyknesse off that alter, and imagery off
tymbre werk; and what hyght the arche is to the grounde off the ilde,
and how hye the grounde off the qwyr is hyer than the grownde off the
ilde.
Item, I praye yowe late the mesur by pekthred be taken or elt mesured by
yerde, how moche is ffrom the northe gate, ther the brygge was, at
Gressham to the sowthewall, and in lyke fforme ffrom the este syde to
the west, also the hyght off the estewall, and the hyght of the sowthest
towr ffrom the grownde, iff ye maye easely. Also what bredde every towr
is within the wall, and whych towr is moor then other within.
Alsso how manye ffote, or what brede eche towr takythe within iche
corner off the quadrate[112-1] ovyrthwert the dorys, and how many
taylors yards is from the moote syde, wher the brygg was, to the hyghe
weye, or to the heddge all a longe the entre, and what brede the entre
is be twyen the dykys. I praye yow, iff ye have a leyser in any wyse, se
thys doone yowrselffe iff ye maye; or ellys iff Pampyng do it, or who
that ye thynke can doo it, I wolle spende xx_d._ or as ye seme to have
the sertayn off every thyng her in. And as for my ffaders tombe,
I charge yow se it yowr selffe, and when I speke with yow I woll tell
yow the cawses why that I desyr thys to be doon.
As ffor tydyngs, the Kyng, and the Qwyen, and moche other pepell, ar
ryden and goon to Canterbery, nevyr so moche peple seyn in Pylgrymage
hertofor at ones, as men seye.
Alsso it is seyde that the Erle of Penbroke[112-2] is taken on to
Brettayn; and men saye that the Kynge schall have delyvere off hym
hastely, and som seye that the Kynge off France woll se hym saffe, and
schall sett hym at lyberte ageyn.
Item, Thomas Fauconbrydge hys hed was yesterdaye sett uppon London
Brydge, lokyng into Kent warde; and men seye that hys brother was sor
hurte, and scope to seyntwarye [_sanctuary_] to Beverle.
Sir Thomas Fulfforthe escaped owt of Westminster with an C. sperys, as
men seye, and is in to Devenshyr; and ther he hathe strekyn off Sir John
Crokkers hed, and kylt an other knyght off the Corteneys, as men seye.
I wolde ye hadd yowr verry pardon at onys; wherfor I praye yow ffayle
not to be at London within iiij. daye afftr Seynt Feythe;[113-1] ye
schall do goode in many thynges, and I praye yow sende me worde heroff
by the next massenger; and if it come to Mestresse Elysabeth Hyggens, at
the Blak Swan, sche schall conveye it to me, ffor I woll not ffayle to
be ther at London ageyn within thys vj. dayes.
Mestresse Elysabeth hathe a son, and was delyveryd within ij. dayes
afftr Seynt Bertelmew;[113-2] and hyr dowtr A. H. was the next daye
afftr delyveryd off an other sone, as sche seythe, xj. weks er hyr tyme;
it was crystened John, and is ded. God save all! No mor tyll I speke
with yow.
Wretyn at London on Mychellmesse Evyn.