_To my most worchepfull Modyr, Margaret Paston, be thys delyveryd in
hast._
[Sidenote: 1471 / JULY 17]
Ryght worchepfull modyr, I recomand me to yow, and as lowly as I can,
I beseche yow of yowr blyssyng. Please yow to undyrstand that thys
Wednysday Sir Thomas Wyngffeld sent to me, and let me wet that the Kyng
had syngnyd my bylle of perdon, whyche the seid Sir Thomas delyveryd me;
and so by Fryday, at the forthest, I tryst to have my perdon ensealyd by
the Chanceler, and soone aftyr, so as I can fornyshe me, I tryst to se
yow, if so be that eny of the Kynges hows com in to Norwyche. I wold
fayne my gray horse wer kept in mewe for gnattys. Also, modyr, I beseche
yow that Dollys and his felawe may be sent to, that I may have my money
redy ayenst that I come home, whyche is dew to be payid, for thys mater
hathe cost me the settyng over. Also that it may please yow that Purdy
at Heylysdon maye be sent to for the horse that he hathe of myne, and
that the horse may be kept well, and have as myche mete as he wyll eate
be twyx thys and that I come home, and that Jakys nage have mete i now
also. Also, and Syr Thomas Wyngfeld come to Norwyche, that he may have
as good chere as it please yow to make on to that man that I am most
behold to for hys gret kyndnesse and good wyll, for he takyth full my
part ayenst my gretest enmyeys, Brandons and hys brodyr William; for at
my fyrst comyng to Sir Thomas Wyngfeld, bothe William Wyngfeld and
William Brandon the yonger wer with Sir Thomas, and had gret wordys to
myn owne mowthe, and in cheff W. Wyngfeld; and wher so evyr he may met
me on evyn grownd he wyll do myche; but and we met evynly, no fors, so I
have yowr blyssyng. I prey yow, with owght it be to my Lady Calthorp,
let ther be but fewe woordys of thys perdon. No more, but I prey God
preserve yow and yours.
Wretyn the Wednysday next before Mary Mawdelen,
By your humblest sone,