[Sidenote: 1471 / JULY 5]
Most worchepfull and my ryght specyall good modyr, as humbylly as I can,
I recomand me on to yow, besechyng yow of your blyssyng. Please it yow
to undyrstand that thys day I spake with Batcheler Water, whiche let me
have undyrstandyng of your welfare, wherof I thank God with all my hert.
Also he leet me have knowlage that the Lord Scalys had grauntyd yow to
be my good lord, wherof I am no thyng prowd, for he may do leest with
the gret mastyr; but he wold depert ovyr the see, as hastyly as he may;
and because he wenyth that I wold go with hym, as I had promyseyd evyr,
and he had kept foorthe hys jornay at that tyme, thys is the cause that
he wyll be my good lord and help to get my pardon. The Kyng is not best
pleasyd with hym for that he desyerthe to depert, in so myche that the
Kyng hathe seyd of hym, that wen evyr he hathe most to do, then the Lord
Scalys wyll sonest axe leve to depert, and weenyth that it is most be
cause of kowardyese. As for pardon, I can never get, withowght I schold
paye to myche money for it, and I am not so purveyd. As for Herry
Hallman, my brodyr wyll axe hym no sylver tyll ye be payeyd; therfor ye
may send to hym and have it.
Item, I am sory that ye have fadyrd my hors that was at Caster to be my
Brodyr Edmundys, for I had leveer that they had hym style then owght
ellys; wherfor thow they profyr hym yow from hense foorthe, let not my
brodyr Edmund take hym, but let him sey whedyr they wyll let hym have
hym or not, that I have promyseyd my brodyr Edmund a bettyr hors for
hym, so that he wyll not cleyme the same for hys. As for tydyngs her be
non but that the Scottys and Walyshe men be besy; what they meane I can
not seye. My cosyn John Loveday can tell yow, and ther be eny odyr
flyeyng talys, for he hathe walkyd in London, and so do not I. When I
may I wyll come hom with Godys grace, whom I beseche to sende you your
hertys desyeyr. Wretyn the v. daye of Julle.
Be yowr humblest sone and servant,