_. . . . . Paston, &c._
[Sidenote: 1470 / AUG. 5]
Brother, I comand me to yow, &c. . . .[80-2] Also telle John Pampyng
that the mayde at the Bulle at Cludeys at Westminster sent me on a tyme
by hym to the Moor a rynge of goolde to a tookne, whyche I hadde not off
hym. Wherffor I wolle he scholde sende it hyedre, ffor sche most have
itt ageyn, or ellys v_s._, ffor it was not hyrrys. Item, I praye yow be
redye; the mater qwykennythe bothe ffor yowe and yowres as well as ffor
us and howrys.
As ffor tydynges, my Lorde Erchebysshop[80-3] is at the Moor, but ther
is beleffte with hym dyverse off the Kynges servantes, and as I
understond he hathe lysence to tarry ther tyll he be sente ffor. Ther be
many ffolkes uppe in the northe, soo that Percy[80-4] is not able to
recyst them; and soo the Kynge hathe sente ffor hys ffeeodmen to koom to
hym, for he woll goo to putt them downe. And soom seye that the Kynge
sholde come ageyn to London, and that in haste, and as it is sayde
Cortenayes be londyd in Devenschyr, and ther rewle.
Item, that the Lordes Clarance and Warwyk woll assaye to londe in
Inglonde evyrye daye, as ffolkes ffeer.
I praye yow late not John Mylsent be longe ffrom me, with as moche as
can be gaderyd: and also that ye wryght to me off all thynges that I
have wretyn to yow ffor, so that I may have answer off every thynge.
Other thynges Bacheler Walter, berer heroff, schall informe yow.